موقع نجوم بلس ينقل لكم أحدث الأخبار لحظة بلحظة من مصادر موثوقة، مع تغطية شاملة لمختلف المجالات لضمان وصول المعلومات إليكم بدقة وشفافية. تابعونا لمعرفة التفاصيل أولًا بأول.
أثار الفنان عمر كمال جدلًا واسعًا بعد تصريحاته الأخيرة التي رد فيها علي منتقدية علي شغلتة الترفيهية
نشر الفنان عمر كمال فديو عبر صفحتة الرسمية علي فيسبوك قائلا: “للناس اللي بتقولي أحط شهادتي فين … أوكي. أنا عايز أردّ ردّ مفصّل، ودي أول مرة أردّ على السؤال ده.
وأضاف: مبدئيًا… كل احترامـي وتقديري للمهندسين، وللأطباء، وللضباط، ولكل الناس المتعلمة اللي هما أفضل مني في المجتمع. وقولًا واحدًا هما أهم مني، لأن دورهم في المجتمع ما نقدرش نستغنى عنه. ممكن تستغنى عني عادي، لكن ما تقدرش تستغنى عن الدكتور، ولا عن المهندس، ولا عن الظابط… الأمن والأمان أساس. إنما أنا شغلتي ترفيهية.
وأكمل: حضرتك بتحاسبني على حاجة أنا ماليش ذنب فيها. إنت اخترت طريق في الحياة وأنا اخترت طريق. لما كنت بتروح جامعتك الصبح وتعيش حياتك، أنا كنت واقف في صف عمال باليومية، ومعرفش يومي هيبقى إزاي. إنت اخترت طريق الأمان أو التقليدي… وأنا حطّيت مستقبلي على كفّ عفريت.
وأضاف: ليه بتحاسبني على شهادتك وتحطّها فين؟ أنا مالي. إنت اخترت الطريق وإنت تتحاسب عليه. وبعدين تيجي تقولي: إنتوا اللي واخدين ودّعوكوا في البلد… طب حضرتك قولي تعرف مين من الأرجنتين غير ميسي؟ تعرف مين من البرتغال غير كريستيانو؟ اتكلم عن أمريكا… تعرف مين غير إيلون ماسك؟ تعرف مين من نجوم هوليوود؟ طب قولي علماء الذرة أساميهم إيه؟ مش هتعرف.
وتابع :أنا مالي إنت كنت بتروح الكلية الصبح مع أصحابك، وأنا كنت واقف مع مقاول معرفش هياخدني ولا لأ. بقولك: النهارده إحنا كنا سبعين، والشركة عايزة خمسين. أروح أكلم المقاول: معلش عايز اليومية. أشتغل “مضافة”… أخش مكاتب المهندسين، أجيب لهم فطار، أجيب طلبات. بس عمري ما قفّفت، ولا قلت دورة ومش دورة. أنا ارتضيت حياتي.
وواصل: فالشهادة تحطّها فين؟ في الدرج؟ تعلقها على الحيطة؟ تشتغل بيها؟ ده اختيارك… وأنا مش مسؤول عنه.
وبعدين… إنت متضايق مني ليه؟ هو إنت كنت في التعليم وأنا كنت معاك ونجحت بالكوسة؟ هو إنت كنت مرشح لشغلانة وأنا خطفتها منك؟ أنا فلوسي ما باخدهاش من الدولة… باخدها من الناس. فيه سعر، وعرض وطلب.
وتابع: ليه بتحاسبني على اختيارك إنت؟
بقيت مهندس، بقيت دكتور، بقيت ظابط، بقيت محاسب… ربنا يبارك لك. وأنا ربنا يبارك ليّ. بس لما تيجي تقولي: أصلّك ضغط… هنشوف الشهادة نحطّها فين؟ طب أنا مالي؟
وأضاف :ومع ذلك، التعليم اللي إنت تعلمته ما منعكش إنك تقلّ أدبك عليّ… وتشتمني. بس أنا عمري ما شتمتك. تدخل تقولي:
إنت جاهل… الشهادة تحطّها فين… اللي زيّك…
إنت، إنت، إنت…
بس أنا؟ عمري ما ههينك.
واكمل: تعليمك علّمك إزاي تهزّق الناس؟ تبصّ لهم بطبقية؟ علشان حصلت على تعليم معين تبقى أحسن منهم؟
أنا عمري ما عملت كده.
وختم: بالعكس… أنا دايمًا بقول إنك أفضل مني في المجتمع، ودورك أهم. عندي صحاب ضباط ودكاترة، عمري ما بنادي حد فيهم باسمه كده… احترامًا له. رغم إني أكبر منهم سنًا وشهرة… بس هما في العشرينات وأنا في التلاتينات.
أقول للدكتور: يا دكتور.
وأقول للمهندس: يا باشمهندس.
لإن أنا عارف إن دوركم أهم مني إنت ممكن تعيش من غير غنا… عادي جدًا.
لكن ما تعيشش من غير أمن وأمان… ولا من غير دكتور… ولا من غير مهندس.
فأنا بحترمك… وياريت تحترمني.”
