في 15 أغسطس سنة 2003، اتولد مازن نصار في قرية تصفا التابعة لمركز كفر شكر بمحافظة القليوبية، ونشأ في بيئة ريفية بسيطة زرعت فيه معاني الرجولة والشهامة من بدري. اتربى على الاحترام، والمسؤولية، وإنه يكون دايمًا مسالم، وبيحب الخير للناس.
مازن معروف بين أهله وأصحابه بطيبته وخفة دمه، ودايمًا عنده ردود خفيفة الدم، شوية “إفيهات”، وجرعة خفيفة من التنمر الظريف اللي يخلي اللي حواليه يضحكوا من قلبهم، وساعات بيقلبه شوية “تنمر شرير” بس كله في إطار الهزار مش أكتر.
بداية الطريق… شغل وخبرة من بدري
بيدرس حاليًا في معهد الوادي العالي – قسم تسويق وإدارة أعمال، لكنه من قبل ما يدخل المعهد وهو بيعتمد على نفسه. مازن اشتغل من صغره في مجالات كتير، طارة هنا وطارة هناك، وكل مرة كان بيخرج من التجربة بأكتر من درس.
جرب يشتغل في مشاريع خاصة، وفترة دخل في تربية الدواجن، لكنه ما حسش إن ده المكان اللي يحقق فيه شغفه. بس التجارب دي علمته حاجات كتير عن الحياة، وعن الصبر، وعن أهمية إنه يلاقي نفسه في حاجة يحبها.
السوشيال ميديا… نقطة الانطلاق
أول خطوة في عالم السوشيال ميديا كانت من خلال صديق كان قريب منه جدًا، واشتغلوا مع بعض فترة، لكن بعد شوية كل واحد مشي في طريق. ومن هنا قرر مازن يكمل الطريق بنفسه، وفعلاً دخل المجال بجدية، لحد ما وصل لشركة Wolfverse Marketing Agency، وهناك بدأ يثبت نفسه بسرعة.
التألق في الميديا باير والمودريتور
بذكائه وحماسه، مازن لفت نظر كل اللي حواليه، وخصوصًا في مجالي الميديا باير(Media Bayer) وإدارة المحتوى كمودريتور. طريقته في الشغل مختلفة، بيعرف يركز، ويقدّم أفكار، وفي نفس الوقت بيخلي جو الشغل ممتع ومليان ضحك.
“مكنة عمري” والجدعنة اللي مفيهاش مقابل
بعيد عن الشغل، مازن دايمًا بيقول:
الجدعنة مش محتاجة فلوس… محتاجة قلب نضيف
معاه مكنة بيحبها جدًا وبيقول عليها “عمري”، وعمره ما حس إنها عبء، بيستخدمها دايمًا في توصيل أي حد لأي مكان، من غير ما يستنى شكر أو مقابل. ودايمًا لما حد يقوله شكراً، بيرد بكلمة واحدة:
ولا يهمك… أنا تحت أمرك يا نجم
الكلمة الأخيرة
مازن نصار مثال لشاب مكافح، عارف هو عايز إيه، وبيعرف يجرب ويعيد المحاولة لحد ما يوصل. مش بس ناجح، لكن كمان محبوب، وجدع، وقريب من الناس.
واللي جاي لسه أحسن… لأنه دايمًا بيشتغل على نفسه، وبيسعى يكون شخص أقوى، وأفضل من اللي كان عليه مبارح.
